Мемлекет басшысының бағыт-бағдары қалай?..

Президент сұхбаты

         Қазақстан Республикасының Президенті Қ.К.Тоқаевтың жыл басында, яғни қаңтардың 3-ші жұлдызында республикалық «Ана тілі» газетінің тілшісі Ерлан Жүніске берген сұхбаты өткен жылды қорытындылап, жаңа жылға жаңа жоспарлармен бөліскен ашық диалог ретінде ел халқына жолданды. Бұқаралық ақпарат құралдары мен әлеуметтік желілерде жарияланып, талқыланды. Тұрғындар ой-пікірлерін жеткізді…

          Осы тұрғыда сұхбат-жолдаудың басымды бағыттары туралы аудан тұрғындарының пікірлерін білдік. Аға буын, орта буын және жастар өкілдерінің өзіндік айтар ойы мен пайымды пікірлері бар.

Жолдыбай Әуесов, Ырғыз ауылдық округі ардагерлер кеңесінің төрағасы:

 –  ҚР Президенті Қ.К.Тоқаевтың берген сұхбатын оқыдық. Аудан ардагерлері арасында өзара талқыладық. Ел дамуының жаңашылдық жоспарларын бекемдеген тұжырымды бағыттар қуантады бізді. Әрине, ең бірінші байлық – ел тыныштығы мен тұрақтылығы. Қазіргі жаhандық қауіп-қатер көп заманада тұтастық қажет. Әлеуметтік мәселелер, экономика мен инфрақұрылым жұмыстарын күшейту, табиғи-техногендік апаттардың алдын алу шаралары, білім-ғылым, мемлекеттік басқару тетіктері т.б көптеген маңызды мәселелер қамтылған. Сонымен қатар, тіл, дін, жастар мәселесі жан-жақты көрініс тапты.

Мысалы мемлекет басшысының сұхбаттағы, — «… Сөз арасында айта кетейін, дүние жүзінде 7 мыңнан астам тіл бар. Соның ішінде үш мыңнан астам тілге жойылып кету қаупі төніп тұр. Қазақ тілі бұл топқа кірмейді. Ана тіліміз 2024 жылы әлемде ең кең таралған тілдердің арасында 79-шы орынға тұрақтады. Осы ретте күрделі әрі қарама-қайшылыққа толы кеңес заманында ана тілімізді әлемдік лингвистика картасынан жойылып кетуден сақтап қалған зиялы қауым өкілдерінің, ақын-жазушылардың, журналистер мен ғалымдардың, мұғалімдер мен мәдениет қайраткерлерінің, ауыл еңбеккерлерінің, яғни барша отаншыл азаматтардың еңбегін бағалауымыз керек..» деген нақты ойы маған өзгеше әсер етті.

Қасымхан Әбенов, Халықаралық «Қазақ тілі» қоғамы Ырғыз аудандық филиалының төрағасы, Ырғыз аудандық білім және ғылым қызметкерлері кәсіподақ ұйымының төрағасы:

–  Ел дамуына ешбір ел азаматы бей-жай қарамауы тиіс. Өйткені, жер ортақ, ауа ортақ, су ортақ қоғамда өмір сүріп отырған соң оның әрбір ісіне алаңдап отырамыз…

Жуырда Президентпен болған көлемді сұхбат ортаға өзгеше ой тастады. Жаңашылдыққа жетеледі, ғаламдық масштабтағы мәселелер туралы ойлау қажеттігін көрсетті. Ғылым-білім саласының өзекті  шаралары, білім беру ұйымдарының жұмысына басымдық берілді.

Мемлекет басшысы «Заң мен тәртіп»  қағидасын ұсынғаны мәлім… Осы орайда сұхбаттағы, « — «Заң мен тәртіп» қағидасы құқық қорғау саласына ғана арналған деп тұжырымдаған дұрыс болмайды. Мен бұл қағиданы тереңірек түсінемін. «Заң мен тәртіп» – мемлекеттік құрылыстың басты қағидаты. Бұл ретте жазалау шараларын қолдану арқылы қоғамға жаппай бақылау орнату туралы айтып отырған жоқпыз. «Заң мен тәртіп» қағидаты – шын мәнінде кемел демократияның тірегі, құқықтық мемлекеттің негізі. «Заң мен тәртіпке» бағынбасақ, құқық нормаларына құрметпен қарамасақ, Әділетті Қазақстанды құрып, оны өркендеген мемлекет ете алмаймыз.
Сондықтан біздің міндетіміз – бұл қағидатты еліміздің құндылықтар жүйесіне барынша кіріктіріп, халық болмысының, қоғам өмірінің ажырамас бөлігіне айналдыру. «Заң мен тәртіпті» берік орнықтыру үшін көп уақыт пен күш-жігер қажет екенін түсінемін. Себебі бәрі бірдей бұл қағидатты қатаң ұстануға, оны өмір салтына айналдыруға әлі дайын емес. Бірақ талаптанған адам қалайда мұратына жетеді…» деген пікірі тегеуірінді тәртіптің керек екені және баршаға ортақ екенін айқындайды…

Дана Орысбайқызы, Ырғыз аудандық жастар ресурстық орталығының маманы:

– Мемлекет басшысының «Ана тілі» газетіне берген сұхбаты — халқымыз үшін маңызды әрі құнды құжат болды. Жастар ұжымы болып оқып, таныстық, өзімізше пайым жасадық. Президент сұхбатында негізгі мәселердің — бірі жастар саясаты туралы тұщымды ойын жеткізген.

Қазіргі жастардың еңбек нарығында сұранысқа ие болуы үшін қабілетін дамытуға және кәсіби тұрғыда өсуге деген талпынысы ерекше маңызды. Бұл қасиеттер олардың өнімді  еңбекке дайын болуын қамтамасыз етеді. Жастар құнды білім жинақтау үшін шет елге кетуді таңдайды. Алайда , жас мамандар елге оралып, Қазақстанның игілігіне жұмыс істеу үшін барынша қолайлы жағдайлар жасалу қажет. Сондай-ақ сұхбатта көптеген  өзекті мәселелерді айтып өтті. Сол міндеттер мен жоспарларды орындау үшін баршамыз бірігуіміз керек, әрқайсымыз өз қызметімізді сапалы жасауға тырысуымыз керек деп есептеймін. Сондықтан бірлігі мықты елдің болашағы да жарқын екенін  ескере отырып, жұмыла көтерер жүктің барлығымыз үшін ортақ екенін естен шығармасақ деген пікірдемін.

         Пікірлескен, Руслан Ұзақбаев,газет тілшісі