АССАЛАУМАҒАЛЕЙКУМ, ОЙЛЫ ОҚЫРМАН !!!
Жыландай жылжып кірген жаңа жылмен бірге табалдырығымыздан жақсылық кірсін, ағайын!
Жыл жаңа, ел жаңа, заман жаңа уақытта бұқара мен қоғамның жүгін жеңілдетуге жылдар бойы жанын сала қызмет етіп келе жатқан төл басылымдарыңыз – «Ырғыз» газетімен тағы қауыштыңыздар!
Тегермеші тоқтамайтын дөңгеленген дүниеде өзгеріс көп, даму шапшаң, қауіп мол, арпалыс аз емес… Қоғам дамуына өз хал-қадірінше үн қосып келе жатқан әріптес-журналистеріміз де жылнама көшінен қалмайды.
Бірқатар жыл өзге салаларда шыңдала-сынала жүріп, маған да 20 жыл бұрын аудан орталығында еңбек жолымды бастаған қадірлі «Ырғыз» редакциясына жыл басында қайта қызметке келудің сәті туды… Журналист, тілші ретінде қалың оқырманмен қауышқаныма қуаныштымын! «Ырғызбен» бірге болайық, бауырлар!
Жыл басында бөлісетін бірқатар мақсатымыз да жоқ емес… Сіз бен Біз болып газетіміздің көркемдік талғам-сапасын, рухани-әдеби мазмұнын, ақпараттық талдау бағытын дамытсақ игі іс болар еді! Ол үшін оқырман мен газет арасындағы алтын арқау көпірдің құрылысын қатайту, бұрылысын бекемдеу жұмыстары тұр. Ақпараттар ағыны көз ілеспес жылдамдықпен дамыған заманда газет, кітап оқу деңгейі кемшіндегені жасырын емес… Дегенмен, бұдан «Ырғыз» газетінің оқырмандары мүлде жоқ деген түсінік қалыптаспауы керек. Қазірде 1200-ге жуық оқырманы бар ауданымыздың айна-басылымына жазылу жалғаса бермек…
Гаджет пен смартфонның сұранысы мол заманда ұрпағымыздың жаны мен дені саулығын ойлау – өте маңызды іс. Баршамызды осы маңызды мәселе де ойландыра жүрсе…
Ұлттық құндылықтарды ұлықтасақ, тарихымызды тұгендесек, қоғамның сыры кеткен тұстарын сауатты сынай білсек, қарапайым еңбек адамын дәріптесек, жақсылық жаңалықтарды жарыса жарнамаласақ деймін. Осы орайда, газет жоспары бағытында «Айтпаса сөздің атасы өлер», «Тыңдалмаған сөз жетім», «Ел ішіндегі еңбеккер», «Тасадағы таланттар», «Темір тәртіп», «Телефонға телміруде талайлар» сияқты т,б. көптеген тақырыптық айдарлар ашсақ деген ойдамыз. Осындай бастамаларымызға өзіндік ой-пікірлеріңізді қосып, газетпен үндесуге шақырамыз! Жалпы жыл басында жүйелі жоспарымыз аз емес, алдағыны АЛЛА біледі, ағайын…
Газет беделін өсіру, аясын кеңейту, келбетін көркейту, бұқарамен байланысын нығайту жұмыстарында ырғыздық оқырмандарымыз жыл барысында бізбен бірге болады деген сенім зор, Сіздерге оқырман! Жазарымыз көп, айтарымыз мол болсын, жерлестер!
Руслан Жарқынұлы ҰЗАҚБАЕВ,
газет тілшісі, ҚР Журналистер Одағыны мүшесі.
