«ЗАҢҒА БАҒЫНҒАН ҚҰЛ БОЛМАС…»

Атақты батыр Момышұлы Бауыржан атамыздың жігерлі нақылы талайға рух береді. Талайды тәртіпке шақырады. Заңның үстемдігі мен мәртебесін мойындатады…

Қоғамдағы орын алып жатқан түрлі деңгейдегі қылмыстың алдын алу, ашу, құрықтау жолында Ырғыз ауданы полиция бөлімі қызметкерлерінің өзіндік еңбектері бар. Қашанда өмірлері қыл үстінде жүретін мамандық иелері күн-түн демей қырағылық қызметтеріне адалдық танытып келеді…

Осы орайда бөлімде кадр саясаты бағытында атқарылып жатқан бірқатар жұмыстар жайында Ырғыз ауданы полиция бөлімі бастығының кадр саясаты жөніндегі орынбасары, полиция майоры Әсел Боранбайқызы Даменовамен сұхбат өрбітудің сәті түскен еді…

Әсел Боранбайқызы, полиция саласындағы қызмет баспалдақтарымен жуырда басшылық құрамға тағайындалған екенсіз. Қызметіңізге сәттіліктер тілейміз! Бөлімдегі кадр жұмыстары негізгі міндетіңіз, аудандық полиция бөлімінде қазір қанша қызметкер қызмет етуде?
Рахмет… Ырғыз ауданы полиция бөлімінде қазіргі уақытта 35 қызметкер еңбек етуде. 5 орын ваканция бос тұр…
Ол орындардың орнын толтыруға мүмкіндік бар ма? Полиция қызметіне ниетті қызығушы азаматтар бар ма ауданда?
Әрине, бар. Кадр тарту мәселесінде жұмыстанып жатырмыз. Осы бос тұрған лауазымдар бойынша және үміткерлердің қалауы бойынша Ырғыз ауданы полиция бөлімі арқылы үміткерлерді қабылдаймыз.

Қойылатын талаптар: жасы 18-35 аралығындағы қыз және ер балалар. Білімі- орта, арнаулы орта, жоғары. Өзгерістер бойынша егер жоғарғы білімді азамат болса, әскерде болу міндетті емес. Бұл жоғарғы оқу орындарын бітіріп жатқандар үшін үлкен мүмкіндік, әскерге бармаған болса да, келіп құжат тапсыруларына болады. Ер балалар үшін бойы 170-тен кем емес, қыз балалар үшін 160-тен кем емес болуы керек. Егер тергеу бөліністеріне баратын болса, ер балалар үшін 165 см, қыз балалар үшін 157 см болса қабылданады. Сонымен қатар, басты талаптардың бірі медициналық талаптарға сәйкес келу керек, физикалық даярлығының жақсы болуы және соттылығы болмауы керек.

ІІМ-нің 3 академиясы бар: Алматы, Қостанай, Қарағанды қалаларында және 1 институт Ақтөбеде, заң институты бар.

Жоғарғы оқу орындарына үміткерлерге талаптар бірдей физикалық медициналық тұрғыдан дайын болу керек. ҰБТ-дан 50-ден төмен балл жинамау керек және әр пәннен 5 балдан төмен болмау керек.

-Қызметкерлерді көтермелеу бағытында қандай жаңалықтарыңыз бен жетістіктеріңіз бар?

— 2024 жылы ҚР ІІМ-нің және ПД-ның бастығының құқығымен 5 қызметкер марапатталып, 1 қызметкер «Құқықтық тәртіпті қамтамасыз етуге қосқан үлесі үшін» медалімен наградталды. Сонымен қатар, Полиция күні мерекесі қарсаңында 30 қызметкер, жылдың қорытындысына сәйкес 27 қызметкер ақшалай көтермеленді.

Төтенше жағдай кезіндегі, ауа райының қолайсыздығына байланысты жолдардың жабылуы кезінде полиция қызметкерлерінің күндіз-түні ұйқысыз қоғамдық қауіпсіздікті қамтамасыз етудегі еңбектері айтпай кетуге болмайды.

Ырғыз ауданы ПБ-нің жеке құрам арасында заңдылықты сақтау, қызметтік тәртіпті нығайту және психологиялық тұрақтылықты сақтау мақсатында қоғамдық ұйымдармен тығыз байланыс жасау арқылы мәдени шаралар ұйымдастырылып, қызметкерлердің қоғамдық шараларға қатысуы жүзеге асырылып отырады.

Аудан көлеміндегі мәдени-спорттық шараларға қызметкерлердің қатысу қарқыны енді бой көтеріп келе жатыр. Футболдан және воллейболдан бір-бір командадан шығарып, іштей жарыстарға дайындап жатырмыз. Одан бөлек, аптасына 2 рет қызметкерлермен дене шынықтыру сабағы өткізіліп, қолма-қол ұрыс тәсілдері үйретіліп кәсіби даярлап отырамыз.

Аудандық шаралардан бөлек, республика деңгейіндегі шараларда бақ сынап, ІІМ-нің ұйымдастыруымен Астана қаласында өткен «Міндет! Абырой! Ерлік!» байқауында Ырғыз ауданы ПБ ППТ қызмет инспекторы Адес Жұбаев «Үздік авторлық ән» атағын жеңіп алды.

Сонымен қатар, жас кадрлерді тәрбиелеуге де аса мән беріледі… ҚР ІІМ-нің 2022 жылғы 14 қарашадағы №896 «Ішкі істер органдарына алғаш кіретін адамдар үшін тәлімгерлікті ұйымдастыру қағидалары мен мерзімдерін бекіту туралы» бұйрығына сәйкес, ағымдағы жыл ішінде бөлімдегі жас қызметкер Нұрбек Қонақбайға тәлімгер бекітіліп, тәрбиелік, психологиялық және идеологиялық жұмыстар жүргізілді. Аталған қызметкердің қазіргі уақытта қызмет атқаруға деген құлшынысы мен сауаттылығын ерекше атап өткім келеді. Қызметтік этика мен көпшілікпен араласуда жас маман ширығып келеді.

Тәрбие мен тәртіп бір-бірін толықтырып отыратын ұғым.. Осы орайда ұжымдағы тәртіп мәселесі туралы не айтар едіңіз?

Тәртіп тұрғысында айтар болсам, ҚР ІІМ-нің 2023 жылғы 06 қаңтардағы №7 бұйрығымен бекітілген «Ішкі істер органдарында офицерлер және полицейлер жиналыстарын ұйымдастыру туралы» ережесін сәйкес, жиналыс құрамы бекітілді. Оның қарауында 14 офицерлік жиналыс өткізіліп, 12 қызметкер тәртіптік жауапкершілікке тартылды.

Офицерлік жиналыстың мақсаты — қызметкерлерді тәрбиелеу, қызметтік және тәртіптік теріс қылық көрсеткендерді жеке құрам арасында талқылап, тәрбиелік ықпал ету шараларын қолдану, алдағы уақытта бодырмаудың алдын алу.

Ұжымдағы бірлікті сақтау мен полицияның оң имиджін қалыптастыру мақсатында ұлттық және атаулы мерекелер аталып өтіліп, ұжымның барлық мәдени шараларына ІІО-ның ардагерлері қатыстырылып келеді. Ырғыз ауданы ПБ-нен зейнеткерлікке шыққан 9 ардагер ПБ-нің алғыс хаттарымен және 2 ардагер «Құрметті ардагер» медалімен наградталды…