МАМАН ТАПШЫЛҒЫ – МАҢЫЗДЫ МӘСЕЛЕ

Президент Жолдауына орай

        Мемлекет басшысы Қ.К.Тоқаевтың өткен жыл соңында халыққа жариялаған жолдауында бірқатар мәселелердің шешілу жолдары белгіленіп, көптеген тапсырмалар берілгені анық. Осы орайда,  біз қызмет етіп отырған медицина саласына байланысты 6-басымдықта «Ұлт саулығын нығайту үшін кешенді шараларды қолға алып, халықты әлеуметтік қолдау жүйесін жаңғырту керек…» — деп атап көрсетті…

      Ауқымы кең, жалпы халықтық үлкен салада қордаланған мәселелер аз емес. Мысалы, денсаулық сақтау саласына биыл бюджеттен 3,3 триллион теңге қаржы бөлінді. Бюджеттің мүмкіндігі мен міндеттемесін ескере отырып, мемлекет кепілдік беретін медициналық көмектің бірыңғай базалық топтамасын жасау қажеттігі айтылды. Ал одан асып кеткен шығынның бәрі сақтандыру жүйесі арқылы төленуге тиіс екен.

Жолдауды тыңдап, талқылау бағытында ескеретін жайттар мысалы, еліміздегі денсаулық сақтау саласын дамыту үшін мемлекеттік-жекеменшік әріптeстік тетіктері арқылы ресурстарды белсенді тарту қажет деп табылды. Өкінішке қарай, шетелдердің мемлекеттік-жекеменшік әріптeстікке қатысты озық тәжірибелері заңнамамызда толық көрініс тапқан жоқ. Мұның бәрі жобалардың тиімсіз болуына, бюджетке түсетін салмақтың тым артуына әкеп соқтырады. Бұл тәсілдерді қайта қарап, инвестиция тарту үшін ақылға қонымды тарифтер ұсыну қажет. Үкімет денсаулық сақтау және білім беру саласындағы мемлекеттік-жекеменшік әріптестікке қатысты жаңа нормативтер мен ережелер әзірлеуі керек деген тапсырма берілді.

Ал, саладағы ең өзекті мәселе – маман тапшылығы. Оның шешілу жолдары да жолдауға өзек болған. Бұл мәселені шешу үшін, ең алдымен, медицина саласындағы білім сапасын барынша арттырған жөн. Соның ішінде грант құнын білім беру үдерістерінің деңгейіне қарай саралау арқылы белгілеп,  тиімді тарату қажет.

Сонымен қатар, жолдауда көпбалалы отбасыларды қолдау үшін сәби күтіміне өтемақы төлеу мерзімі бір жылдан бір жарым жылға дейін ұзарды.

Жалпы алғанда, жолдаудағы міндеттерге қарай тапсырмалар уақытылы орындалуымен құнды болмақ. Заң мен тәртіп аясында атқарылатын жұмыстар мейілінше сапалы атқарылса медицина саласының дамып, ілгерілеуіне де тың серпін береді деген ойдамын.

Илияш Бердімұратқызы Жолдасова

Ырғыз аудандық орталық ауруханасы

бас дәрігерінің емдеу ісі жөніндегі орынбасары