Тұрғындармен кездесті
Жылдағы дәстүрге сай барлық деңгейдегі әкімдер ел алдында есеп беру жұмысын бастады. Өткен аптада аудан әкімі Н.Қызбергенов Жайсаңбай, Тәуіп, Қызылжар және Ырғыз ауылдық окрутерінде болып, халықпен кездесті.
Кездесулерде ауылдық округ әкімдерінің есебі тыңдалып, аудан әкімі ауданның әлеуметтік-экономикалық даму көрсеткіштеріне тоқталып, алда атқарылар жұмыстарымен бөлісті.
- Биылғы жыл Жайсаңбай және Құйлыс ауылдарының тұрғындары үшін оңайға түспегені баршаға мәлім. Көктемгі су тасқынынан елдің ауызбіршілігі мен мемлекеттің қолдауының нәтижесінде қиындыққа төтеп берген көршілес екі ауыл тұрғындарының әлі де шешімін табар мәселелері жеткілікті. Мәселен, жайсаңбайлық тұрғындар ауыл мен аудан орталығын байланыстырар күре жол ұдайы бақылауда болса дейді. Бұлай деулерінің себебі де жоқ емес. Жаздай ауданмен байланыстыратын күре жолға жету үшін өткелсіз өзеннен қайықпен қатынаған тұрғындар үшін екі жерден бөгет салынып, жол қатынасы қалыпқа келген болатын. Сонымен қатар, жөндеуді қажет етіп тұрғын Ө.Қанахин атындағы орта мектептің жылу жүйесін тоққа айналдырса деген өтініштерін тағы да ортаға салды.
- Құйылыс орта мектебінің жылу жүйесін де тоққа айналдыру мәселесі бүгінгі күні өзекті болып тұр. Осы уақытқа дейін көмірмен жылытылып келген Ө.Қанахин және Құйлыс орта мектептерінің жылу жүйелерін электр жүйесіне қосу кезек күттірмейтін мәселе дейді ауыл тұрғындары. Сонымен қатар, көктемгі су тасқынының салдарынан балабақша ғимараты жарамсыз деп танылып, Құйлыс ауылының бүлдіршіндері бұл күнде мектепте тәрбиеленуде. Осыған орай, Құйлыс ауылына балабақша мен дәрігерлік амбулатория қажет екендігін қаперге салды тұрғындар.
- Қызылжар ауылдық округінің тұрғындарымен болған кездесуде де бұған дейін айтылып келе жатырған мәселелер көтерілді . Округ орталығы – Құрылыс ауылына кіреберіс 6,9 шақырым автокөлік жолының аяқталмай қалғандығы, спорттық-сауықтыру кешені құрылысының тоқтап қалуы сынды мәселелерге мән берілсе дейді тұрғындар. Сонымен қатар, Жаныс би және Шеңбертал ауылдарынан Құрылыс ауылына дейін көтерме жол салынса деген ұсыныстарын ортаға салды.
- Ырғыз ауылдық округіне қарасты Қалыбай ауылының тұрғындары осы уақытқа дейін уәде етіліп келген жаңа мектеп салынса деген тілектерімен қатар, ауылға көгілдір отын тарту мәселелесі де назардан тыс қалған жоқ.
- Ақши ауылының тұрғындары Ақши бөгерінің жай-күйіне алаңдаушылықтарын білдіріп, талапқа сай жөнделсе деген ұсыныстарын жеткізді. Сонымен қатар, ауыл келбетіне кедергі келтіріп тұрған ескі үйлердің мәселесі д
е сөз болды.- Аудан орталығы – Ырғыз ауылында қазіргі таңда ең кезек күттірмейтін мәселелердің бірі – көшеаралық маршрут шығару болып түр. Бұған дейін де айтылып келе жатырғанымен, әлі де шешімін табар емес. Сонымен қатар, қаңғыбас иттердің көбейіп кетуі де ауыл тұрғындарымен қатар, мектеп оқушыларының өміріне қауіп төндіріп тұрғандығы айтылды.
Әр ауыл тұрғындары көтерген ортақ мәселелерді тыңдаған аудан әкімі шешілу жолдарын түсіндіріп, кейбір кезек күттірмейтін мәселелер бойынша округ әкімдеріне тапсырмалар берді.
Аудан бойынша осы уақытқа дейін атқарылған жұмыстар төңірегінде жиналғандар алдында есеп берген аудан басшысы Н.Қызбергенов өңіріміз үшін биылғы жыл табыссыз емес екендігін жан-жақты баяндап, үстіміздегі жылдың негізгі міндеттеріне басымдық берді.
