Тұмауға қарсы вакцинациялау басталды
15 қыркүйекте облыс тұрғындарын тұмауға қарсы жаппай вакцинациялау басталды.
Бұл туралы өңірлік коммуникациялар қызметінде өткен брифингте облыстық санитариялық-эпидемиологиялық бақылау департаменті басшысының орынбасары Мұхтар Сербаев мәлімдеді.
Аталған мәліметтерге сүйенсек, бүгінгі күнге дейін облыста 407 мыңнан астам тұрғын ЖРВИ-мен ауырған. Оның 61 пайызы балалар. Тұмау бойынша тіркелген 10 жағдайдың 80 пайызы 14 жасқа дейінгі балалар арасында анықталған.
Биыл жоспар бойынша 185922 адамға тұмауға қарсы екпе беріледі. Бұл облыс халқының 20 пайызын құрайды. Тұмауға қарсы егу науқаны барлық қалалық және аудандық емханаларда тегін және ақылы түрде жүргізіледі.
Бірінші кезекте вакцинация медицина қызметкерлеріне, медицина ұйымдарында диспансерлік есепте тұрған балаларға, әлсіз және алты айдан асқан көп ауыратын балаларға, қарттар үйі контингенті және мүгедектеріне, жүктіліктің екінші немесе үшінші триместріндегі жүкті әйелдерге, жүрек-тамыр жүйесінің созылмалы аурулары бар адамдарға жасалады.
Облыстың санитар дәрігерлері жұқпалы аурулардың, оның ішінде тұмаудың алдын алудың ең тиімді және ғылыми дәлелденген әдісі – вакцинация екенін еске сала отырып, тұрғындарды екпе алуға шақырады.
