Салауатты қоғамның кепілі – тазалық пен тәртіп
Өткен жылы мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» — экологиялық акцияцы өңір-өңірде биыл да белсенді түрде жалғасын табуда.
«Таза Қазақстан» акциясы – қоршаған ортаны қорғауға бағытталған маңызды бастама. Бұл шараның басты мақсаты – тек қалалар мен ауылдарды емес, табиғи орта мен мәдени ескерткіштерді де таза ұстау. Акцияға қатысушылар саябақтар, көшелер және қоғамдық орындарды қоқыстан тазартып, айналаны таза ұстауға, көгалдандырып, табиғатты қорғауға атсалысады.
Біздің ауданымызда да «Таза Қазақстан» республикалық акциясы шарасына көптеген тұрғындар мен мекеме қызметкерлері қатысып, бірлесіп аумақты тазалауға күш салуда. Әсіресе, жастардың белсенділігі ерекше байқалады. Мұндай акциялар тек экологияны жақсартумен ғана шектелмейді, сонымен қатар қоғамның экологиялық мәдениетін арттыруға және болашақ ұрпаққа табиғатты таза күйде қалдыруға үлкен үлес қосады.
Аталмыш акцияның мақсатын айқындап, жасөспірімдерді таза қоғам қалыптастыруға үндеу жолында аудан мектептерінде кездесулер мен экологиялық тәрбие сағаттары өткізілуде. Кездесулер барысында мектеп оқушыларына табиғаттың адам өміріндегі маңыздылығын насихаттай отырып, оны аялауға, сақтап қорғауға өз үлестерін қосуға шақырды.
Тазалық – тек сыртқы көріністі ғана емес, ішкі тәртіпті де көрсететін маңызды құндылық. Оны өмір салтына айналдыру – денсаулық пен ұзақ өмірдің кепілі.
Тазалық пен тәртіп – кез келген аймақтың табысты дамуының кепілі ғана емес, тұрғындардың мәдениеттілігінің өлшемі.
«Ауылына қарап, азаматын таны» дейді дана халқымыз. Сондықтан да, әр елді мекеннің тазалығы, сәулетті көркі тұрғындардың жанашырлығына байланысты екені белгілі. Себебі әр көшенің, әр үйдің, әр ауланың тазалығы – тұтас қала мен ауылдың айнасы. Қашанда қандайда бір игілікті іс болмасын, алғашқы қадамнан басталады. Осы орайда, әркімнің отбасынан бастау алып, туған өлкеге деген шынайы жанашырлықтың көрінісі – тазалық пен тәртіп мәселесіне аудан тұрғындары азаматтық парызбен атсалысады деген сенімдеміз.
