«Құрылтай өтті, Құдай жарылқады!»
Бұл Торғай мен Ырғыз өңірлері халқының құрылтайдағы ел Президенті Қасым-Жомарт Тоқаевтың сөздерінен кейінгі жүрекжарды, қуанышты лебіздері. Телефонда дамыл жоқ, Ырғыздан Торғайға, Торғайдан Ырғызға, одан қалды республиканың түкпір-түкпірінен осы екі елге сүйіншілеген хабарлар келіп жатыр, жан-жаққа тарап жатыр. Әлі де жалғасуда. Аптыққан көңіл басылар емес.
Енді қайтейік, кешегі кезде елдің экономикалық дамуы артта қалған аудандарының қатарында аталған Ырғыз бен Торғай еді. Тәуелсіздіктің алғашқы кезеңінде болашағы бұлыңғыр аудандар аталып, алыс ауылдары келешегі жоқ елді мекендер санатына жатқызылды. Осыдан кейін ауыл жастарының қалаға үдере көшуі белең алды…
Қасым-Жомарт Кемелұлы Президент болып сайланған алғашқы күннен-ақ “ауылдарды сақтауымыз керек, ауыл – біздің тірегіміз” деп ауылға ерекше көңіл бөліп келеді. Шүкір, қазір осы бағытта көп шаруалар қолға алынуда. Былтырғы алапат су тасқынында тұтас бір ауыл суға кетіп, ел-жұрт енді қайтеміз деп дағдарғанда Президент халықты сабырға шақырып, бірде-бір отбасы қамқорлықсыз қалмайды, зардап шеккендер жүз пайыз баспанамен қамтамасыз етіледі деп еді. Сол сәтте әлдеқалай болар екен деген сенімсіздіктің қылаң бергені рас. Бірақ, нәтижесіне куәміз, халық игілігін көріп отыр. Нұра ауылдық округінің тасқын судан зардап шеккен 120 отбасы тұтастай жаңа жобамен салынған жаңа үйлермен қамтамасыз етілді. Құрылтайда Президенттің аузынан Астана-Арқалық-Торғай-Ырғыз автожолы салынады деген шешім айтылғанда жұрттың сөз ауанынан «Президент айтса, көп ұзамай игілігін көреміз» деген сенім аңғарылып тұрды. Бұл жол аталған өңірлердің әлеуетін арттырып, келешекке деген сенімін нығайта түсетіні даусыз.
Құрылтайда елдің көкейінде жүрген көп мәселелер қозғалып, сарабдал жауаптар берілді. Өзгерістерді көз көріп, құлақ естіп отыр. Елді дамуы көз алдымызда. Президент алға айқын мақсат қойып, міндеттерді белгілеп берді. Енді олардың өз жемісін беруі үшін әрбіріміз атсалысқанымыз жөн.
Нұрқасым Сәрсенбайұлы, еңбек ардагері, Ырғыз ауданының құрметті азаматы
