Конституция — адал азамат пен жауапты қоғамның негізі

Ақтөбе қаласындағы Ахмет Байтұрсынов атындағы лингвистикалық мектеп-гимназиясында да жаңа оқу жылының алғашқы күнінде оқушыларға Конституцияның маңызы, заң мен тәртіпті сақтау және экологиялық мәдениетті қалыптастыру бағытында тәрбие сағаты ұйымдастырылды.
Мектептің бастауыш сынып мұғалімі Ақмарал Жасанованың айтуынша, алғашқы тәрбие сағаты бастауыш сынып оқушыларына түсінікті әрі қызықты форматта өткізіліп жатыр:
— Бүгінгі тәрбие сағатында балаларға Ата Заңымыз — Конституцияның мәнін түсіндіріп, өз құқықтары мен міндеттері туралы айтып өттік. Сонымен қатар «Таза Қазақстан» бастамасы аясында қоршаған ортаны қорғау мен тазалықтың маңызына тоқталдық, — дейді ұстаз.
Тәрбие сағаты барысында оқушылар Конституция ұғымымен танысып қана қоймай, тәртіп сақтау, бір-бірін құрметтеу, табиғатты аялау сияқты қарапайым, бірақ маңызды құндылықтарды талқылады.
Мектеп директоры Бекболат Бозшиннің айтуынша, биылғы оқу жылында білім беру ұйымдарында құқықтық сауат пен экологиялық мәдениет тақырыбына ерекше мән беріліп отыр.
— 2026–2027 оқу жылын мектебіміз 1 420 оқушымен бастайын деп отыр. Өткен оқу жылын 1385 оқушымен аяқтаған едік. Биыл бірінші сыныптар саны да көбейді. Алғашында бес бірінші сынып ашу жоспарланғанымен, бала санының көптігіне байланысты алты бірінші сынып ашылатын болды, — дейді мектеп директоры.
Жаңа оқу жылындағы маңызды бағыттың бірі — оқушылар мен ата-аналардың құқықтық сауатын арттыру. Осыған байланысты тәрбие жұмысы Конституция, заң мен тәртіп тақырыптарымен қатар экологиялық мәдениетті қалыптастыруға бағытталған.
— Қазіргі таңда барлық білім беру ұйымдарында тәрбие сағаттары заң мен тәртіп, Конституция және экологиялық мәдениет тақырыбына негізделіп өткізіліп жатыр. Бұл бағыт оқушыларға ғана емес, ата-аналар мен ұстаздарға да ортақ жауапкершілікті қалыптастыруға мүмкіндік береді. «Таза Қазақстан» бастамасы арқылы балалардың табиғатты аялау, қоршаған ортаны таза ұстау мәдениетін қалыптастыруға мән береміз, — дейді мектеп директоры.
Мектептегі бірыңғай сынып сағаттарына 1–11 сынып оқушылары түгел қатысты. Іс-шаралар сыныптарда бірінші және екінші ауысым оқушыларына да ұйымдастырылды. Ал жаңа оқу жылындағы негізгі сабақтар ертең, 2 қыркүйектен басталады.
Жалпы, алғашқы тәрбие сағаты оқушыларға Конституцияның қоғам өміріндегі рөлін түсіндіріп қана қоймай, адалдық, жауапкершілік, тәртіп және қоршаған ортаға қамқорлық секілді құндылықтарды дәріптеуге бағытталды. Ұстаздардың айтуынша, бұл — өскелең ұрпақтың құқықтық сауатын арттырып, ел болашағына жауапкершілікпен қарайтын азамат қалыптастырудың алғышарты.

Мейрамгүл РАХАТҚЫЗЫ.