КИМЕШЕГІ КИЕЛІ, ТӘРБИЕСІ ЖҮЙЕЛІ… ырғыздық әжелердің «АЯЛЫ ӘЖЕ…» аудандық форумы өтті
Республикалық деңгейде Түркістан облысынан бастау алған «Әжелер – ұлт ұйытқысы» рухани шаралары аясында Ырғызда ардагерлер кеңесі аудан әкімдігімен бірлесіп ұйымдастырған аудандық «АЯЛЫ ӘЖЕ…» форумы өтті. Форумға аудан әкімдігі мен мәслихаты аппараты қызметкерлері, ауылдық округ әкімдері, аудандық мәслихат депутаттары, еңбек ардагерлері, ауылдық Әжелер кеңестері мен өзге де қоғамдық ұйымдардың мүшелері, білім және мәдениет салаларының өкілдері, жастар, мекеме-кәсіпорын басшылары қатысты.
Қазақ қоғамында ұрпақ тәрбиеcі мен ұлттық салт-дәстүрімізді дәріптейтін асыл әжелердің орны мен рөлі әрқашанда ерекше болған.
«Қарты бар үйдің — қазынасы бар» дегендей, ата мен әже – ел тұлғаларын өсіретін ұлттық мектеп деп айтуға болады. Бұл форумның маңызы өте зор болды. Өйткені, әжелер ұлтымыздың ұйтқысы, жастарға халқымыздың құндылықтарын, салт-дәстүрін, тәрбиесін жеткізетін үлкен институт. Сондықтан да әжелерді ұлықтасақ, құрмет көрсетсек, соларға еліктесек, болашақта ақ жаулықты аналарымыздың жолын жалғай аламыз…
Осы ұстанымды мақсат еткен форумды құттықтау сөзбен ашқан Ырғыз ауданы әкімінің орынбасары Серік Қонақбаев ұлттық тәрбиенің құндылықтарына тоқтала келе, ұлы Абайдың әжесі Зередей ұлағаты ұрпағына дарыған дана әжелердің жолын қайта жаңғыртуда жаңадан құрылып жатқан Әжелер алқасының атқаратын қызметі үлкен екендігін атап өтті. Ал, Ақтөбеде өткен облыстық форумға қатысқан Ырғыз аудандық ардагерлер кеңесінің төрағасы Мирхан Дуанбеков пен кеңес жанынан құрылып, жұмысын бастаған Әжелер кеңесінің төрайымы Набат Байдәулетова қазақылық пен тәрбиенің тірегі болған әжелердің құрметін жоғары мәртебеледі. Жер-жерде жаңадан жұмыс бастаған кеңестің жұмысына белсенділікпен қатысып, әрбір ауылдағы әжелер мен аталар бұйығы жатпай ұрпақ қамы үшін берілер тәрбиені нығайтуға атсалысқаны жөн деп түйіндеді. Форумда әр округте ұрпақ тәрбиесіне үлес қосып жүрген белсенді аналар — бірқатар ауыл әжелеріне аудандық Ардагерлер кеңесінің Алғыс хаттары табысталды. Ал, форумға арнайы шақыртумен келген Республикалық «Қазақ аналары-Дәстүрге жол» қоғамдық бірлестігі Ақтөбе филиалының мүшесі Мақатова Айжан Қорғанбекқызы аналық ақ тілегімен ағынан жарылды. Республикалық «Қазақ аналары — Дәстүрге жол» қоғамдық бірлестігі атынан «Ұлттық тәрбиеге сіңірген еңбегі үшін» төсбелгісімен Қалыбай ауылынан Әбділдина Күлән, «Ұлт дәстүрін дәріптегені үшін» төсбелгісімен құтикөлдік Тәмпішова Людмила, «Ұлт дәстүрін дәріптегені үшін» төсбелгісімен Жайсаңбай ауылынан Ұйқасова Айнұр, «Ұлттық қолөнер, дәстүрлі тағам шебері» төсбелгісімен Құрылыс ауылынан Әлиева Айнагүл марапатталды.
Шара аясында мәдениет үйінің фойесінде ұлттық бұйымдардан көрме өткізіліп, «Арай» мәдениет үйінің жанынан құрылған көпшілікке танымал «Шуақты әжелер» ансамблі мен жергілікті жас өнерпаздар ән-биден салиқалы концерт ұсынды.
Руслан Жарқынұлы, газет тілшісі
