Бурабайда Ұлттық құрылтайдың 4-ші отырысы көңілімізді ерекше шуақтандырды

Ұлыстың ұлы күні қарсаңында, қырауланған қыстан жаймашуақ жадыраған көктемге шығып, халықтың көңілі көтерілген шақта Бурабайда Ұлттық құрылтайдың 4-ші отырысында көңілімізді ерекше шуақтандырған қуанышты хабарды естіп, ырғыздықтар бір-бірімізге хабарласып сүйіншілеп жатырмыз.
Ол көптен күткен, халықтың көкейінде жүрген Астана-Арқалық-Торғай- Ырғыз Транскаспий автожолын салуға Президенттің берген тапсырмасы еді.
Бұл жоба орталық пен батыстың арасын 560 шақырымға қысқартып, ауылы аралас, қойы қоралас, тамырлас, тағдырлас ежелгі көршілер — биыл іргетастары қаланғанына 180 жыл толатын — Ырғыз бен Торғайдың болашағына үлкен үміт сыйлады.
Аймақтарды жалғастыратын алып жол құрылысын салудың оңай еместігі, оның экономикалық тиімділігі, басқа да пайдалы жақтары әбден зерттеліп, зерделеніп барып қолға алынатыны мәлім. «Бітер істің басына, жақсы келер қасына» демекші қаншама сараптамадан өтіп, түрлі жобалардың ішінен осы бағыттың Президент назарына ілігіп, оң шешілуі жаңа көкжиектерге бастайды деген үміт бар. Осындай үміт сыйлаған жоба үшін ырғыздықтардың Қасым-Жомарт Кемелұлына ризашылықтарын сөзбен айтып жеткізу қиын.
Бұл жоба қазақ елінің келешегі жолында, оның дамуына жасалған үлкен қадам деп білемін.

Құдайберген Бекенов, облыстық мәслихат депутаты, Ырғыз ауданының құрметті азаматы

#құрылтай2025