Бөгет жұмыстары бақылауда
Ырғыз ауданы бойынша су тасқынына қарсы бөгеттерді нығайту мақсатында бөгеу жұмыстары қарқынды жүргізілуде.
Аудан орталығындағы жалпы ұзындығы 3.600 метр болатын бөгеттің қазіргі уақыттағы Ырғыз өзенінің максималды көтерілу деңгейі ескеріле отырып, 2,900 метр биіктету және нығайту жұмыстары жандандырылып, құрылыс жұмыстарымен «BNB stroi group» ЖШС мердігер компаниясы айналысуда.
Жауапты мердігер компанияға жоспарлы жұмысты ағымдағы жылдың желтоқсан айында аяқтап тапсыру міндеттелген.
Қарқынды бастау алған бөгеу жұмыстары Аманкөл селолық округіне қарасты Құтикөл ауылында, Тәуіп ауылдық округіне қарасты Құйлыс ауылында, Нұра ауылдық округіне қарасты Белшер ауылында жүргізіліп жатыр.
Құтикөл ауылындағы кіре беріс бөліктен бастау алған бөгеттің жалпы ұзындығы 5 км құрайды. Бөгет құрылысына 14 техника жұмылдырылды.
Құйлыс ауылы аймағындағы бөгет жұмыстарына 25 техника, Белшер ауылы маңындағы жұмыстарға 19 техника белгіленді.
Құрылыс жұмыстарының сапасы мен қарқыны ерекше назарға алынып, аудан басшысы Н.Қызбергенов жауапты мердігер компанияға бөгет құрылысын белгіленген уақытқа аяқтауды тапсырды.
