«Бір ауыл – бір өнім» жобасының жеңімпаздары анықталды
Ақтөбе облысында Ақтөбе өңірінен жеңімпаздарды анықтау бойынша «Бір ауыл -бір өнім» жобасының Бренд — комитетінің отырысы өтті.
Жобаның 10 жартылай финалисті финалға шығу үшін «күресті». Аталған ондықтың ішінде Ырғыз ауданынан түйе сүтінен өнім өндіру ісі бойынша Аманова Тазагүл, киізден этно киім өндірісі –Сағынғали Айдана, қымыз өндірісі-Садриева Нағима болды.
Отырыс барысында жартылай финалистер өз өнімдерін кезекпен таныстырып, өндірістегі проблемалар туралы айтып, жоспарларымен бөлісті. Бренд-комитет мүшелері өз кезегінде әр кәсіпкерге қосымша сұрақтар қойып, өз пікірлерін білдіріп, ұсыныстар берді.
Іс — шара Ақтөбе облысының өңірлік кәсіпкерлер кеңесінің төрағасы Асхат Айтжановтың төрағалығымен, кәсіпкерлер палатасының директоры Дидар Боранқұловтың қатысуымен өтті. Бренд комитетінің құрамына кәсіпкерлік басқармасының, сауда және тұтынушылардың құқықтарын қорғау Департаментінің, стандарттау институттарының, қаржы институттарының, қоғамдық кеңестің, қауымдастықтардың, өңірлік және салалық кеңестердің, БАҚ өкілдері кірді.
Отырыс қорытындысы бойынша үш кәсіпкер үздік деп танылды.
Жеке кәсіпкер Сағынғали Айдана киізден этно киім өндірісімен үздіктер қатарынан табылды.
Жеңімпаздарға «Атамекен» тарапынан өндірісті кеңейту және қажет болған жағдайда экспортқа шығу бойынша қолдау көрсетілетін болады. Бренд комитетінің мүшелері отырысқа келген барлық кандидаттарға бизнесті масштабтау және өнімнің нарықтық әлеуетін арттыру мәселелері бойынша кеңес берді.
Айта кетейік, «Бір ауыл – бір өнім» жобасы «Мемлекеттік қолдау шаралары қолданылатын мемлекеттік қаржылық қолдау қағидаларын, нысандарын, экономика секторларын бекіту туралы» Қазақстан Республикасы Әділет министрлігінің 2023 жылғы 27 қарашадағы № 33681 бұйрығына сәйкес 10 қосымшамен бекітілген «Мен-кәсіпкер» құралы шеңберінде іске асырылуда. Жобаның негізгі міндеті-ауыл тұрғындарының кәсіпкерлік әлеуетін арттыру, қолда бар шикізатты қолдана отырып өнім шығару, жаңа жұмыс орындарын ашу. Бұған дейін, тамыз айының соңында жобаның 28 қатысушысының өнімдерінің көрмесі ұйымдастырылып, жұмыс тобы 10 жартылай финалистті іріктеп алды.
