ӘДІЛЕТ ПЕН ЗАҢҒА БАҒЫНУ – ЕҢСЕЛІ ЕЛДІКТІҢ БЕЛГІСІ
Президент Жолдауына пікір
2024 жылдың 2 қыркүйегінде жарияланған Мемлекет басшысы Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына Жолдауы еңселі ел болуға талпынған қуатты мемлекетіміздің ажарын айқындап, болашағын бағамдады…
Қуатты мемлекет болу қашанда қиындықтарды еңсерген, бірлігін бекем еткен, халқына тұрақты жағдай туғызған, бейбіт күннің берекесін арттырған елге тән екені анық…
Алайда, мемлекет басқару ісінде өмірлік тәжірибе мен білімді ұштастыратын, саясат сахнасында дипломатиялық қарым-қатынастарды тең ұстай білетін, елдің мұң-мұқтажына қанық, халықпен етене жақын басшылар ғана биік белестерді бағындыра алады.
Қазақстан билігін қолына алғанына 5 жылға жуықтаған, әлемдік саясатта өзіндік орны мен беделі бар Президент Қ.К.Тоқаевтың саяси қадамы тұрақтылқ пен бақуатты өсуді көздейді. Халықпен ашық диалог орната білген Мемлекет басшысының әрбір қадамы ел алдында. Жоспарлары мен жолдауларынан да көрініс тауып отырады.
Өткен жылды қорыта келе, 2025 жылға ел болашағының жоспарын бекемдеген Жолдауы да көпшіліктің қолдауын тапты. Халық болып жұмылу мен ел болып бірігудің арқасында адами-табиғи факторлардан туындайтын қауіпте мен апаттардың бірқатарын еңсеріп келеміз. Соның барлығында сабырлылықпен саяси шешімдер қабылдаған Президент ел басқаруда тізгінге нық, жолда түзу деген пікірдемін…
Төмендегідей маңызды 9 тарауды қамтыған
Жолдауды толық оқып, танысқан адам өзінше пайым-талдау жасай алады. Мемлекетіміздің даму жолы қалай, өсу мен өркендеу бар ма, елдік істердегі басты бағыттарымыз қандай деген сауалдарға өзінше жауап алады…
- Ақша-несие саясаты мен фискалды саясаттың арасындағы үйлесімсіздікті жою қажет.
- Инвестициялық ахуалды және бизнес жүргізуге қажетті жағдайды жақсарту жолында үздіксіз жұмыс істеу маңызды.
- Еліміздің өнеркәсіп әлеуетін толық пайдалану үшін жан-жақты шаралар қабылдау қажет.
- Инфрақұрылымға қатысты өзекті мәселелерді шешу қажет.
- Еліміздің кадрлық әлеуетін біртіндеп арттыру өте маңызды.
- Ұлт саулығын нығайту үшін кешенді шараларды қолға алып, халықты әлеуметтік қолдау жүйесін жаңғырту керек.
- Экологиялық ахуалды жақсарту – алдымызда тұрған негізгі міндеттің бірі. Біз қоғамда қоршаған ортаны қорғаудың мән-маңызын кеңінен дәріптеуіміз керек.
- Мемлекеттік басқару ісінің тиімділігін барынша арттыру керек.
- Қоғамда заң мен тәртіп идеологиясын терең орнықтыру қажет.
Осы басымды бағыттарды тәртіптеп айта келе, Президент биылғы жаңа жылды «2025 жыл — Жұмысшы мамандықтар жылы» деп ресми түрде жариялады. Қай мамандықтың да жаманы болмайды…
Ал, оның мақсатты жолын Президент Қ.К.Тоқаев: «…Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз.
Адал әрі табанды еңбегімен табысқа жеткен адамдар қашанда құрметті, сыйлы болуы керек. Бұл біз ұсынып отырған «Адал азамат – Адал еңбек – Адал табыс» қағидатына толық сай келеді.
Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді.
Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі.
Халқымызда «Жұмыстың көзін тапқан байлықтың өзін табады» деген сөз бар. Кәсібіне адал әрі жауапкершілікпен қараған адам қашанда лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек.
Біз түрлі саладағы мамандарға, қатардағы жұмысшыларға құрмет көрсетуіміз қажет. Бәсекеге қабілетті экономикасы бар озық ел боламыз десек, ең алдымен, адал еңбекті бағалаған абзал. Сондықтан инженерлерге, геологтарға, кен орнын игеруші мамандарға, ауыл шаруашылығы, көлік және су саласының қызметкерлеріне, ғалымдар мен өнертапқыштарға берілетін құрметті атақтар мемлекеттік марапаттар санатына қосылады.
Еңбегінің мемлекеттік деңгейде бағалануы барша кәсіп иесіне ерекше шабыт береді, еңбек адамның абырой-беделін көтереді…» — деген үлкен үмітті жоспар-ойымен түсіндірді.
Сонымен қатар, Жолдаудың 8-тарауындағы Мемлекеттік басқару ісінің тиімділігін барынша арттыру бағытына орай, Мемлекет басшысы: «…Азаматтарымыздың соңғы жылдардағы тағы бір талабы – әкімдерді тікелей сайлау жүйесін енгізу. Бұл талап та орындалды.
Ауыл әкімдерін тікелей сайлау жүйесі 2021 жылы енгізілді. Содан бері 2,5 мыңға жуық әкім сайланды. Бұл – барша ауыл әкімдерінің 90 пайызға жуығы деген сөз. Қалғандары әкімнің өкілеттік мерзімі аяқталған кезде өз ретімен сайлана береді. Жаңа әкімдердің 60 пайызы бұрын мемлекеттік қызметте жұмыс істемеген. Олардың арасында әртүрлі кәсіп иелері, түрлі партия өкілдері бар. Орташа жасы – 46 жас. Бір сөзбен айтсақ, халық өзі таңдаған әкімдердің құрамы едәуір жаңғырды.
Былтыр күзде алғаш рет аудан және облыстық маңызы бар қала әкімдерін сайлай бастадық. Барлық облыста 45 әкім жаңа тәсілмен сайланды. Біз сайлау нәтижесін және сайланған әкімдердің жұмысын жан-жақты зерделедік. Соның қорытындысы бойынша түбегейлі шешім қабылдадық. Келесі жылдан бастап жаңа жүйеге біржола көшеміз. Бұдан былай аудан және облыстық маңызы бар қалалардың әкімдері тікелей сайлау арқылы ғана қызметке келеді. Әкімдердің өкілеттік мерзімі аяқталуына қарай, яғни ротация мерзімі жеткенде сайлау біртіндеп өткізіле береді. Бұл да – саяси жүйені реформалау ісіндегі кезекті маңызды қадам. Саяси реформа – бір реттік науқан емес. Мемлекеттің дамуына қажет болса, реформалар осылай үздіксіз жалғаса береді…» — деп тұжырымдады.
Жодаудағы тағы басқа көптеген бағыттар әлі де қоғамдық талқылау мен пікірлесуді, түсіндіру-насихаттауды, ел арасында бірлік диалогқа шақыруды қаузайтын бір-бір тақырыпқа жүк болады. Ал, менің өзіндік пікірім осыған саяды…
Болат Мырзабекұлы Итібаев, Ырғыз аудандық аумақтық сайлау комиссиясының төрағасы
