Табиғатты қорғау – азаматтық парыз

Жер бетіндегі тіршілік атаулының құтты мекені – табиғат. Дана халқымызда табтғат – туған жер, атамекен ұғымдарымен қатар тұратыны да сондықтан. Ықылым заманнан адам баласы табиғат алдында өзін жауапты, табиғаттың барлық жаратылысын киелі санап, бұлақ көрсе көзін ашып, жастайынан ұрпақ санасына сіңіріп, бойларын жақсылыққа үйреткен.

Жалпы қоршаған ортаның бүтіндігін сақтау үшін табиғат пен адам арасында жаңа көзқарас қалыптастырудың маңызы зор. Әрбір қоғам мүшесі табиғат құбылыстары заңдылықтарымен  таныс болуы тиіс. Экологиялық сауатсыздықты жою үкіметіміздің халық арасында жүргізетін маңызды мәселелеріне айналуы қажет.

Елімізде еркеше қорғалатын аумақтар – қорықтар мен ұлттық парктерде, резерваттарда «Парктер шеруі» экологиялық акциясы тұрақты түрде өткізіліп келеді. Табиғат қорғау акциясына «Ырғыз-Торғай мемлекеттік табиғи резерваты» мемлекеттік мекемесі де тұрақты түрде атсалысып, жыл сайын 22 наурыз бен 5 маусым аралығында экологиялық акцияны өткізуді дәстүрге айналдырған резерват қызметкерлері резерват аумағындағы жойылу қаупі бар өсімдіктер мен «Қызыл ктапқа» енгізілген  жануарлар жөнінде дәрістер өткізеді.

Сонымен қатар, жұртшылықты өзен-көлдер арналарын тазартып, тұрғын үйлер мен мекеме, кәспорын аулаларына ағаштар мен басқада көпжылдық өсімдіктер егіп, көгалдандыру жұмыстарына шақырады.

«Парктер шеруі» экологиялық акциясының пайда болу тарихына келер болсақ, ең алғаш рет 1840 жылдың 22 сәуірінде АҚШ-та ағаш егу күні ретінде бастал­ған іс-шара 1882 жылы мемлекеттің ресми мерекелері санатына енді. Табиғат жанашырларының ба­сын біріктірген акция 1970 жылдан ­бастап «Жер күні» мерекесі бо­лып өзгерді. Адамзат өз үйі – Жер­дің бетін қоқыстардан арылтып, ағаш-бұта отырғызуды насихаттайтын 22 сәуір мерекесі 1990 жылы «Парктер шеруі» болып өзгерген күні әлемде бір мезгілде ұйымдастырылған ағаш отырғызу акциясына 141 мемлекеттен 200 млн адам қатысқан.

Біздің елімізде 1997 жылдан басталған «Парктер шеруі» экологиялық акциясы «Табиғатыңды таза ұста!» деген ұранмен басталған жал­­­пы­халықтық іс-шараның ауқы­мы ел аумағында ерекше қанат жа­йып, жыл сайын осы іс-шараға бел­сенді қатысатын азаматтар қа­тары көбейіп келеді.

Ұлыстың ұлы күні Наурыз меркесі қарсаңында «Ырғыз-Торғай мемлекеттік табиғи резерваты» мемлекеттік мекемесінде «Парктер шеруі» акциясының ашылу салтанаты өтті. Ізгілікті шараға резерват қызметкерлері, мекеме ардагерлері мен мектеп оқушылары қатысты. Мекеме басшысы А. Бақтыбаев «Ырғыз-Торғай мемлекеттік табиғи резерваты» мемлекеттік мекемесінің  табиғат қорғаудағы жүйелі жұмыстарына тоқталып, акция қатысушыларға сәттілік тіледі. Мекеме ардагерлері О.Сақтағанов, М.Дунабеков табиғат қорғау мекемесінің өткені мен бүгінгі тыныс-тіршілігн талдай келе, барша қатысушыларды туған жердің табиғатын қорғауға шақырды.

Мекеме қызметкерлір концерттік бағдарламаларын ұсынып, мектеп оқушылары арасында ұлттық ойныдардан жарыстар ұйымдастырылып, жеңімпаздар марапатталды. Шараға жиналғандар Наурыз көжеден дәм татып, мекеме ардагері Н.Сәрсенбайұлы бата берді.

Ырғыз-Торғай мемлекеттік табиғи резерватының ұйымдастыруымен «Парктер шеруі» акциясы арқылы мектеп оқушыларына экологиялық тәрбие беру жұмысы қарқынды жүргізіліп келеді.

Мекеме инспекторлары мектеп оқушылары арасында «Өз елімді сүйемін, табиғатына бас иемін» тақырыбында сурет салу және еліміздің көрікті жер­лері туралы шығарма жазу, «Құс­тарға қамқор болайық» және «Құра­лай» қолөнер байқауларын ұйымдастырады.

Сонымен қатар, та­би­ғатты ластамау, қоқыс тастамау, көгалдандыру жұмыста­рын тұрақты түрде жүргізу, өзен-көлдердің бойын таза ұстау, бала­ларға экологиялық тәрбие беру – осы ізгілікті жұмыстың бас­ты бағыттарының бірі болып саналады. Ауқымды табиғатты қорғау акциясы дәстүрлі түрде өткізіліп,  жылдан жылға қоғамдық сипатқа ие болып келеді.

Табиғатты қорғау экологиялық акциясы барлық қамқор адамдарды ерекше қорғалатын табиғи аумақтарды (қорықтар, ұлттық парктер, қорықшалар және табиғи ескерткіштер) қолдау идеясының төңірегіне біріктіреді.

Табиғатты қорғау қарапайым дүниеден басталып, халықтың экологиялық сауатын ашу, жас­тарға үздіксіз білім беру нәтижесінде ғана шешілетіні анық. Әрбір адам табиғатты қорғауда, сақтауда және оны дұрыс пайдалануда ұрпақ алдында, тарих алдында жауапты екенін ұмытпаса екен дейміз.

«Табиғатсыз адамзаттың күні жоқ, оны айтуға табиғаттың тілі жоқ» деп халық даналығында айтылғандай, табиғатты қорғау біздің міндетіміз, болашақ ұрпаққа қалдырар байлығымыз. Сондықтан табиғаттың жанашыры болу әр адамның міндетті борышы екенін біліп жүргеніміз абзал, ағайын.

«Ырғыз»-ақпарат