СУ ТАСҚЫНЫ: ҮМІТ пен КҮДІК…

    Өткен жылы көктемде басталып, жыл бойы жер-дүниені әбігерге салған су тасқынының зардабы ел есінде. Шығын шаш етектен болды. Ауылдар мен қалалар қирады. Аудан тұрғындары да көптеген қиындықтарды бастан өткерді. Ел жұмыла бірікті, билік қал-қадірінше әрекет етті. Мал-мүлік орны толды, жан-адам аман болды…

   Биылғы көктемге де санаулы күн қалды. Су тасқынына қарсы дайындық қалай? Төтенше жағдайларға қарсы тұрар қауқарымыз бар ма? Өткен долы тасқын қиындықтарынан сабақ алдық па?..

   Халықтың көңіліндегі күдікке толы осындай сұрақтарға жауап іздеу мақсатында Ырғыз аудандық төтенше жағдайлар бөлімінің басшысы Азамат Жаналинге хабарласқан болатынбыз. Қауырт шаруалардың қамымен ауылдық округтерге жолсапарда жүрсе де бөлім басшысы редакцияға арнайы соғып, атқарылып жатқан жұмыстарды баяндап, ақпараттарымен бөлісті…

« — Төтенше жағдай, апат айтып келмейді ғой. Өткен жылғы тасқын әрине, оңайға соққан жоқ. Аудан былтырғы тасқында 4000 текше метр суды қабылдаған екен. Ауданымыз әлі төтенше жағдай жарияланған сатыда тұр. Қазірде аудан бойынша 6 бөгет салынып, 3 бөгет жөндеуден өтті. Шеңбертал, Мамыр, Белшер, Жайсаңбай, Дүкен, Тәуіп, Ырғыз елді-мекендерінде 7 гидропост орнатылды. 25 000 қап дайын, моторлы 4 қайық, 16 мотопомьпа жасақталды. Қазгидрометтің берген мәліметтерімен ауа-райына қарай іс-қимыл жасап отырмыз. Торғай бағытындағы судың тасу қаупі бар екені рас. Жалпы, аудан су тасқынының орташа тәуекел сатысында тұр. Қауіп жоқ деп айта алмаймыз. Арқаны кеңге салуға болмайды. Тасқынның алдын алудың барлық шаралары қатаң бақылауда. Мұз жаруға да арнайы қаражат бөлініп, наурыз туғасын Шеңбертал, Ырғыз ауылдарында мұз жару жұмыстары жүргізіледі деп жоспарлануда. Азаматтық жұмылдыру шаралары қабылданады. Сонымен қатар, Жайсаңбай, Құйылыс ауылдарына 60 әскери көмек жасақталды. Уақытында орналасады. Әзірге берер ақпарат, мәліметтер осындай. Іс-қимыл барысында тұрғындарды құлақтандырып, ақпарат беріп, сақтық шараларын қабылдап отырамыз» — дейді аудандық төтенше жағдайлар бөлімінің басшысы Азамат Жаналин.

Әрине, қамсыз қалмай тасқынның алдын алуға арналған шаралар ертерек атқарылғаны абзал. Елдің әбігерге түспей, ауылдардың аман қалғаны керек. Айтып келмейтін апатпен күресте жұмыла жүк көтеруіміз қажет-ақ!..

Руслан Жарқынұлы,

«Ырғыз»