Қоғамдық көлікке қашан қол жеткіземіз?!.
Аудан орталығы – Ырғыз ауылы жылдан-жылға көлемі жағынан ұлғайып, тұрғын үйлер санының артуы әрине, көңіл қуантады. Алайда, тұрғындардың талап, тілегін орындау мақсатында әлеуметтік мәселелердің шешілуінің орны бөлек. Қоғам дамыған сайын әлеуметтік мәселелерге сұраныстың артары да белгілі.
Осы орайда, аудан орталығы – Ырғыз ауылы тұрғындары үшін басты өзекті мәселелердің бірі – қоғамдық көлік болып отыр. Бұдан ілгеріректе көшеаралық маршрут жүріп, халық игілігін көрген болатын. Алайда, түрлі себептермен көшеаралық маршруттың тоқтап қалғанына да 2-3 жылдың жүзі болды.
Қазіргі таңда тұрғындар үшін көшеаралық маршрут ауадай қажет-ақ. Әрине, бұл өзекті мәселе аудан әкімі мен Ырғыз ауылдық округінің халықпен кездесулерінде, аудандық қоғамдық кеңестің жиынында қаншама рет көтерілгенімен, нәтиже жоқ. Өткен жылдың қазан айында аудан әкімі Н.Қызбергенов пен Ырғыз ауылдық округінің әкімі А.Оразымбетованың ауыл тұрғындарымен кезекті кездесуінде де осы мәселе көтеріліп, аудан әкімі округ әкіміне көшеаралық маршрут шығарудың жолдарын қарап, өзекті мәселені шешуге тапсырма берген болатын. Одан бері де төрт айдың жүзі болды, шешілген мәселені көрмедік. Өзекті мәселенің шешілуін күтіп жүргенде жаңа жылдың екінші айы да аяқталуға тақалды.
Осы арада айта кету керек, көшеаралық маршрут ең алдымен мектеп оқушыларына керек. Әсіресе, қытымыр қыз мезгілінде мектеп оқушыларының өздерінің білім ордаларына тоңбай-шашырамай жетуі құзырлы орындар үшін сын екені даусыз. Әрине, бұл жерде әр баланы мектепке тасымалдау мен мектептен тыс уақытта оқушы қауіпсіздіне ата-ана жауапты екені бәрімізге белгілі. Алайда, мектеп оқушысының кедергісіз білім алуына жағдай жасап, ұйымдастыру білім бөлімі мен өзге де құзырлы орындардың міндеті.
Үстіміздегі жылдың ақпанынан бастап еліміз бойынша жанар-жағармай бағасы қымбаттады. Қымбаттамастан бірер күн бұрын ватцап группаларда көшеаралық такси иелері қымбаттаған күннен бастап такси құны 300 теңге болатынын ескертіп, дабыл қақты. Сол сол-ақ екен, тұрғындар тарапынан даулы-даусыз түрлі пікірлер айтылып, ортаға салынды. Қазірде «Нұра-Сити» атанып кеткен жаңа аумақта қоныс тепкен тұрғындардың да жанайқайын құлақ шалды…Осы орайда, ата-аналар сөзіне құлақ түрер болсақ, күнделікті сабаққа бару үшін бір үйден 2 немесе 3 бала таксиге отыруы мүмкін болған жағдайда, ондай қаражатты кез келгеннің қалтасы көтере бермейтінін айтып, такси иелеріне қолжетімді баға ұсынысаңыздар деген де өтініштер айтылды. «Ондай жағдайда жеңілдік жасаймыз» деп кейбір такси жүргізушілері уәде де берді. Дегенмен де, қалай айтсақ та бағаны қою такси иелерінің өз еркінде. Осыдан-ақ оқушылардың мектепке қатынауынна жағдай жасау күн тәртібінен түспейтін кезек күттірмейтін мәселе екені көрініп тұр.
Мектепке кеткен баласының амандығына алаңдап отырған ата-ананың талап-тілегіне сонда кім жауап береді деген заңды сауал туындайды. Күнделікті бұқаралық ақпарат құралдары мен әлеуметтік желілерден оқып, біліп отырғанымыздай баланың өмір қауіпсіздігін сақтау бұл күнде қоғамда маңызды мәселеге айналып тұрғаны да жасырын емес. Басқасын айтпағанның өзінде көшедегі қаңғыбас иттерден келер қауіп-қатердің өзі көпшіліктің көңілін алаңдатарлықтай.
Қанша жерден мәселе өзекті болса да, мектеп оқушыларының мектепке уақытылы, қауіпсіз қатынауына жағдай жасалу қажет. Ал, күнде таксилетіп жүруге бәрінің қалтасы көтере бермесі анық. Қоғамдық көлікке қатысты халықтың сауалы жетерлік. Әлеуметтік желілерде жарыса жазған пікірлерді сараласақ, тұрғындар жауаптылардың уәделеріне әбден тойған секілді. Қоғамдық көлік туралы қордаланған мәселенің түйіні қашан шешілмек?
Әзірге мәселенің толық шешілуі де екіталай. Дей тұрғанмен, жауапты азаматтарға жүктелген жұмыстар өз нәтижесін берер уақыт та келер деген сенімдеміз. Бірақ, қашан екені белгісіз…
Мақаланы жариялау барысында аудандық білім бөлімінің жауапты мамандарымен хабарласқанымызда «Көшеаралық маршрутқа мектеп автобусы пайдаланылмайды» деген жауап алдық.
Көпшіліктің көңілін алаң қылып, көптен бері шешімін таппай келе жатқан мәселені Ырғыз ауылдық округі әкімі мен Ырғыз аудандық құрылыс, сәулет, тұрғын үй-коммуналдық шаруашылығы, жолаушылар көлігі және автомобиль жолдары бөлім шешеді деген үміттеміз. Жағымды жаңалық, тұщымды жауап күтеміз…
Т.БЕКЖАНҰЛЫ, «Ырғыз»
