Қос ауылдағы қуаныш
Өткен аптада Қызылжар ауылдық округінің орталығы – Құрылыс ауылы мен Тәуіп ауылдық округінің орталығы – Құйлыс ауылдарында жасөспірімдерге арналған спорт залдары ашылып, пайдалануға берілді.
Бұл спорт залы – «Батыр боламын!» қоғамдық бірлестігінің бағдарламасы шеңберінде ашылған аудан көліменде алғашқы зал. Жобаның басты мақсаты – шалғай елді-мекендерде, балалар үшін спортқа қолжетімділік деңгейі төмен ауылдық жерлерде балалар спортының қолжетімділігін арттыру.
«Қазақстан халқына» қорының демеушілігі және серіктестігімен жұмыс істеп жатқан бірлестік қазіргі күнге дейін еліміздің шалғай аймақтарында көптеген спорт залдарын ашып үлгерді.
Айта кету керек, осы уақытқа дейін «Батыр боламын» қоғамдық бірлестігі Ырғыз ауданында спорттық зал ашу туралы ұсыныстарын білдірген болатын. Сол ұсыныстың сәті түсіп, екі ауыл жасөспірімдерін қуантқан жыл болды.
Спорт залдардың ашылу салтанатына арнайы Астана қаласынан «Батыр боламын» қоғамдық бірлестігінің негізін қалаушы Арман Балкенұлы Уахап, «Батыр боламын» қоғамдық бірлестігінің президенті Ернұр Сәбікенұлы, «Батыр боламын» қоғамдық бірлестігінің Ақтөбе облысындағы өкілі, «Ел жанашыры» төс белгісінің иегері Дәулет Есенгелдин, күрес жанашыры Медет Атабаев арнайы келіп, жиналған жұртшылықпен бірге ақжарма тілектерін арнап, балалармен естелік суретке түсті.
Қызылжар ауылдық округінің әкімі Аслан Жәнібекұлы мен Тәуіп ауылдық округінің әкімі Камал Сәбитбекұлы қонақтарға қазақы дәстүрмен шапан жауып, естелік сыйлықтар ұсынып, алғыс хаттармен марапаттады. Шараға жиналған ақсақалдар батасын беріп, әжелеріміз шашуын шашты. Көңілдеріне қуаныш үйірілген ауыл жасөспірімдері спортпен айналысуларына жағдай жасаған ағаларына рахметтерін жаудырды.
Сапалы құрал жабдықтар мен әр залдың дәл өлшеміне зауыттан арнайы тігілген қорғаныш материалдардан жасалған. Әсіресе, спорт залдарға қойылған «DONIC» үстел теннисі — мемлекетіміздің Президенті Қасым-Жомарт Кемелұлы мен Түркия президенті Ердоғанның кездескенде ойнаған үстел теннисі екенін мақтана айтуға болады.
Күрес залына арналған арнайы төсеніштер, күрес кимонолары, күрестің манекендері, бокс қапшықтары, бокс қолғаптары, бокстың бас киімдері, жаттығуға арналған резеңкелер, үстел теннисінің ракеткалары, шариктері, гантельдер, дзюдо киімдері, тағы да басқа неше түрлі спорт жабдықтары кез-келген баланың спортқа деген ынтасын ашатыны сөзсіз.
