ЫРҒЫЗ АҚЫНЫНЫҢ ЖАҢА ЖЫР КІТАБЫ ЖАРЫҚ КӨРДІ
Есімі көпке таныс ауылдан шыққан жазба талант иесі, ақын, өлкетанушы Серғали Қоблашов жуырда «Бесіндегі беймаза ой» атты жаңа жыр кітабын шығарды.
Елу жастан асқаннан кейін шығарған көптеген өлеңдерінен тұратын бұл кітапта ауылға деген сағыныш, мейірбандық пен бауырмалдық, ауыл адамдарының алғаусыз көңілі көрініс табады. Оқуға жеңіл, тілі шұрайлы, шайыр шабытының шыңдалған шағында шыққан туындылардан ауылдың иісі аңқып тұрғандай…
Кезіндегі қоғамның елеусіз еңбектерінің зейнетін көріп отырған Сәкең қазірде имандылық дәстүрлерін ұстанып жүрген ортаға үлгілі жан. Тарихқа қанық, үйретуге бейім, өлкеге жанашыр С.Қоблашов қашанда қоғамдық істердің бел ортасында жүреді. Осымен төрт кітабы жарық көрген екен. Жергілікті ақын кітаптарын жинақтап, өз қаржысына шығарып жүр. Ұл-қыз тәрбиелеп отырған ардақты әкенің бұл кітабын шығаруға балалары демеушілік жасаған. Ырғыздық зиялы қауымның ортасында аудандық орталық кітапханада кітаптың тұсаукесері өтті.
Өмірден көрген-түйгені көп, байсалды да қарапайым ақын әзір бабында. Кітабының оқырманы көп болып, шалқар шабыты таси берсін деген біздің ниет мол…
Руслан Ұзақбаев, газет тілшісі
