Тазалық жұмыстары басталды
Аудан әкімінің қаулысына сәйкес ауданымызда айналаны абаттандыру мен санитарлық тазарту бойынша екі айлықтың жарияланғаны белгілі. Осыған сәйкес ауданымызда ұйымдастырылған алғашқы жалпы сенбілікке мемлекеттік мекемелер, білім беру ұйымдары, коммуналдық мекеме ұйымдардың өкілдері белсенді қатысты. Әр ұжым өздеріне бекітіліп берілген аумақтарда тазалық жұмыстарын жүргізді.
Мемлекет басшсының бастамасымен өткен жылдан бастап еліміз бойынша «Таза Қазақстан» экологиялық акциясын ұйымдастырылғандығы баршаға мәлім. Сондықтан да, күн тәртібінен түспейтін тазалық мәселесі бір күндік іс-шарамен шектелмеуі тиіс.
Ауыл тазалығы әр отбасынан басталады. Десек те, әлі күнге дейін бізде тазалық мәдениеті қалыптаспай отырғандығы көңілге кірбің ұялатады. Шынын айту керек, қоқысты кез келген жерге тастайтын жандар арамызда әлі де жетерлік. Тазалық басқаға емес, бірінші кезекте өзіміз үшін керек.
Сенбілік ұйымдастырылғанда ауыл адамдары көше тазалығына араласпақ түгілі аула-жайларын жинамай, үй тазалығынан аспай жататыны да жасырын емес.. Тазалық жоқ жерде берекенің болмайтыны да анық. Қанша жерден сенбілік өткізіп, айналаны ретке келтіргенмен кейбір жандардың кесірінен кез келген жерде күл-қоқыстар қайтадан пайда болып жатады. Мұндай келеңсіз жайттарды болдырмау үшін баршамыз да тазалыққа оң көзбен қарап, бір кісідей атсалысқанымыз абзал.
Алдағы уақытта құзырлы орындармен ауыл көшелеріне рейдтер жүргізіліп, тұрғын үйлер араларында белгіленбеген жерлерге күл-қоқыс төккендерге заң шеңберінде шаралар қолдану іске асырылмақшы.
«Ырғыз»-ақпарат.
